Nasaha!

16 Dec 2001

1. Laana, kuteremkia watu, kwanza awali, hunyosheana vidole
   Bayana, wakaondosha na utu, hata wawili, hupigiana kelele
   Uwana, kwa panga na mirututu, si mbali, huyu kuuwa wa yule
   Maana, dhaifu imani zetu, na dalili, kwa bayana twaziona

 

Ibrahim Noor

 

Nasaha!

17 Dec 2001

1. Laana, ada ikifurutu, wenye akili, hugeuka wapole
   Hiyana, ya mtu na mtu, huhasiri mali, tele wa tele
   Amana, za wingi wa vitu, vya asili, na vya kale
   Maana, uchafu wa roho zetu, na dalili, kwa bayana twaziona.
2. Laana, viamboni na misitu, hukalili, ukubwa wa makole
   Hakuna, cha kujaa upatu, cha kumtosha fahali, wana na wavyele
   Hasana, hairudi katu, na kusema kweli, haitarudi milele
   Maana, ufisadi wa nyoyo zetu, na dalili, kwa bayana twaziona.
3. Laana, yazidisha papatu, ikaondoa adili, pole pole
   Hapana, anayethubutu, kujifanya dalali, akatoka mbele
   Amina, ewe mola wetu, twaomba jamali, na utuongole
   Maana, hafifu ibada zetu, na dalili, kwa bayana twaziona.

 

Kassim O. Ali