Mvuvi

31 March, 2002

1. Ndimi mvuvi halisi, kula vuvi nalijuwa
   Nivuwaye mikambisi, na papa wenye khatuwa
   Wala sivui vingisi, mishipi haisumbuwa
        Nimekwambiya elewa


2. Sivuwi bahari ndogo,hatia nanga fuoni
   Havisimbika vigogo, vilivyozama majini
   Na wala sivuwi ngogo, vidagaa na mbinini
        Siwavui asilani


3. Jabali hulijilisi, jishipi nikalitupa
   Haotea mifulusi, na nguru na mijipapa
   Si kasikazi si kusi, khabari yangu nakupa
        Wala sivui kwa pupa


4. Na nivuapo malema, huingia ndani ndani
   Maji yangu ni ya pima, thalatha u thalathini
   Na ndiyo ninayozama, lema halibwaga tini
         Uliza mimi n'nani?


5. Na nivuapo maziyo, mavuvi ya kizamani
   Kwa hino hali niliyo, huvua kwa kutamani
   Hatafuta kiteweyo, cha wali mwema kombeni
         Haandaa siniani


6. Ela uvuvi wa juya, kuvua siutamani
   Sababuye takwambiya, ufahamiwe mwendani
   Ni kwambakwe huingiya, samaki waso thamani
         Kama wewe mwafulani


7. Ni kuu yangu bahari, elewa sana elewa
   Huko hakwendi Vihori, wala vyenu vimashuwa
   Shoti nakhodha hodari, kisha ende kwa ngalawa
         Na milango kuijuwa

Kutoka Malenga wa Mvita

Limeletwa na Maher Fundi

Mvuvi

03 April, 02

1. Shairi limesukika, mjuzi hatosumbuka
   Mvuvi wa kusifika, avua anapotaka
   Havui vitakataka, samaki anayetaka.


2. Kofia nakuvulia, na koja ninakuvika
   Vibua waviachia, dagaa mwiko kushika
   Simvuvi sinzia, ndio maana unawika.


3. Beti tatu nachangia, kukupa heko sawia
   Wengine wamo kulia, mbinu unazotumia
   Waloweze kuwambia, nyayo zako kufatia.

wakatabahu

Hashil S. Hashil

Mvuvi

1. Mvuvi na zako hila, kujisifu si wosia.
   Mvuvi wacha papara, bahari si yako ndia.
   Mvuvi unaokula, ni samaki wa bandia.
   Nakwambia hujavua.


2. Mvuvi huna haraka, kwa samaki walolala.
   Mvuvi zamia sana, bahari za vina saba.
   Mvuvi wavua koa, kwa huko hakuna kamba.
   Hawana ladha wa huko.


3. Mvuvi yako bahari, na milango kuijua.
   Mvuvi yako nadhari, samaki kuwachagua.
   Mvuvi huna habari, wengine si wakuliwa.
   Wapevu wanuka vumba.

Walii Genderi.

Mvuvi

Date: 11 Apr 2002

1. Mvuvi kutaharuki, Kwenye maji ufukweni
   Mishipi haishikiki, Chambo hakionekani
   Imekufika hilaki, Mvuvi wavua nini
2. Tambua hao samaki, Waishio baharini
   Kuna dhofu walo dhiki, Wajao hata demani
   Lakini kuna malaki, Kwao chambo si thamani
3. Mvuvi zako hamaki, Na maguvu muilini
   Watwambia hawatoki, Watulia na yamini
   Mbona kutahamaki, Wameshapenya nyavuni
4. Nakwambia usadiki, Uvuvi pia ni fani
   Ujifunze umiliki, Maarifa kubaini
   Kwanini huambiliki, Samaki hawi mwambani
5. Nisikize sidhihaki, Tutaonana mwakani
   Papa chambo hakitaki, Aja mwenyewe chomboni
   Kuvua kipande hiki, Wajisifu bandarini

A. Baja

Mvuvi

1. Yarabi salama, leo ishapita.
   Na jua lazama, tamaa nakata.
   Mechoka tazama, macho yafukuta.
      Mbona hajarudi,mvuvi matata.


2. Sasa wiki moja, hajatuzukia.
   Katoka kwa hoja, kwenda tuvulia.
   Samaki wa haja, anaojilia.
      Mbona hajarudi.


3. Twemwambia zama, samaki si hao.
   Watakuangama, vumba ndio lao.
   Mbona hakuvuma, kwa kuwala hao.
      Kenda vua wapi.


4. Vihori havyendi, huko avuako
   Nasi hatufiki, bahari za vumo.
   Kina sikiwezi, nikaduru humo.
      Mwenzetu kazama.


5. Mpandao meli, tazameni huko.
   Mvuvi habari, nyumbani hayupo.
   Yu kwenye hatari, humo avuamo.
      Bahari si lake shamba.

Walii Genderi.

N-GONGELE

Mvuvi

1. Walii genderi, tua roho yako
   Mvuvi mahiri, bado yungaliko
   Ana yake siri, kwa huko aliko
   atarudi papo


2. Ilikuwa kali, dharuba ya kusi
   Ikangia vuli, hana wasiwasi
   Alivua kweli, mapapa na ngisi
   Poa roho basi


3. Tarudi nyumbani, na mavuvi tele
   Tena salimini, punguza kelele
   Miye naamini, ana lake yule
   Mso hili ana lile


4. Siku ikifika, nitakukumbusha
   Tena kwa hakika, nitakuamsha
   Mvuvi kafika, tena kwa bashasha
   Nyavu karejesha

Mbarouk

N.York

Mvuvi

28 April, 2002

        Sie mvuvi wa pweza

1. Mwenye kutaka kujuwa, huenda kwenye kiini
   Ili apate elewa, kimekusudiwa nini
   Haruki kwa kupotowa, bila kujuwa undani
   Pandisha nguo tarowa, maji yapanda mwilini
            Hayakupwi asilani


2. Milango hujaijuwa, na dira za baharini
   Nyota hukuzielewa, mekupoteza mwinani
   Tafuta wanoelewa, wenye kuzama majini
   Ndipo hapo utajuwa, siri ya uvuvi nini
           Sirahisi asilani


3. Uvuvi wako uzile, si samaki wa nyavuni
   Hufiki maji kule, marefu si ya fuoni
   Yakikupwa kachokole, chaza na pweza maweni
   Si changu na kolekole, si samaki wa fukweni
            Kiwataka baharini

Maher Fundi

Mvuvi kazama!!! (sikweli wajidanganya)

Date: 29 April, 2002

1. Samaki uwavuao, wanishangaza mwenzangu
   Samakio si mwambao, wala hungoji kiwingu
   Kivulini ndio ngao, samaki wako wa changu


2. Bahari uziendazo, ni za mbali kweli kweli
   Moyoni unayo nguzo, samaki wako ni ghali
   wewe huna matatizo, chumvi kwako si asali.


3. Usemavyo ndio kweli, wendako huonekani
   Waepuka na ajali, kwani wangia kizani
   Ufanyayo ni halali, wabarizi barazani.

Hashil