|
|
Shairi Fumbo!
Date: 28 Nov 2002
- Washairi karibuni, Salamu zangu natowa
Wabara hadi wapwani, Walamu na wakiluwa
Nimeshindwa kubaini, Moyoni la nisuguwa
Kendacho hadi angani, Charuka bila mbawa
- Meuliza mafanani, Vitabu wakafunguwa
Na waalimu wazamani, Na shahada ziso dowa
Wameshindwa kubaini, Bure mnimejisumbuwa
Kendacho hadi angani, Charuka bila mbawa
- Hakitumii mashini, Au nguvu za sola pawa
Wala hakina rubani, Kama meli au mashuwa
Fundi umeamuani, Umeweza kukijuwa
Kendacho hadi angani, Charuka bila mbawa
- Sikusaza arabuni, Nao nimewashituwa
Na khsa hapo omani, Ni wengi naowajuwa
Washairi wa zamzni, Ujuzi usopunguwa
Kendacho hadi angani, Charuka bila mbawa
- Mji wa kwenda yemeni, Fumbo msipo lifumbuwa
Nina sahiba fulani, Moyoni sitomondowa
Nasikia taabani, Maradhi yanamsumbuwa
Kendacho hadi angani, Charuka bila mbawa
Beit-alajaeb
Shairi fumbo
Date: 29 Nov 2002
Mauti mja yakija, mashaka humuingia.
Kendacho hadi angani, Charuka bila ya mbawa.
Mauti haki kwa mja, hakuna wa kukimbia.
Kendancho huko mbinguni, kama livyoahidiwa.
Roho huruka angani, bila mbawa mar'ia.
Ahmed Rashid.
Shairi fumbo
Date: 29 Nov 2002
- Usipate taabu mno, zamani nalisikia.
viko vingi vyenye vuno, navyo vina jirukia.
yalete mengi mavuno, tupate kualikia.
Lete na vitafunio, bashrafu kuanzia.
- Ni vingi havina mbawa, navyo vyajipururia.
lete kwa rangi na sura, tupate kuchagulia.
isiwe kutuburura, hapo hutaambulia.
hatutanasabu chura, tukatoka na ngalamba.
- labda mtu mbumbumbu, jawabu takupatia.
kwa hapa kwetu bububu, kapuni tutalitia.
kwani hilo fumbo butu, halina pa kuanzia.
tena sio la kiutu, kwani linasinzia.
Walii Genderi.
|
