HARUFU INONUKIA

Date: 02 May, 2003

Hili ni shairi nilotunga kuonesha jinsi mama mpenzi anavyompa wasia
mwanawe kutokana na majonzi na kumpa matumaini mema.

Mama uchungu, mama uchungu
yamala mwanangu, nyamala mwanangu
Tumbo la udere limauma mno eee

1. Hamfunza mwana kulea,mtoto ameemewa
   Hamfunza mwana tulia,mazuri yatawadia
   Hamfunza mwana sikia,polepole hii njia
   Harufu inowadia,vikuba vinonukia.



2. Mwana tulia sikia,hao si wa kuridhia
   Mwana hii ni dunia,mengi utajionea
   Ni mama aniusia,haya nawahadithia
   Harufu inowadia,vikuba vinonukia



3. Ungama mwana kilua,maovu utajivua
   Sisubu mwana wabua,wote waweza kulea
   Kigota mwana kilia,kimya kimya yako njia
   Harufu inowadia,vikuba vinonukia.



4. Uyatunze yako mato,wabaya sijeyatoa
   Ukate wako mkato,njia kuipalilia
   Ugubike wako mto,kilala usiumia
   Harufu inowadia,vikuba vinonukia.



5. Mwana nilikuwa mwana,na mimi nikaelezwa
   Wavyele walituwana,kwa kila tulilofunzwa
   Kutapatapa kunena,ni zongo la kufukizwa
   Harufu inowadia,vikuba vinonukia.



6. Bwana kipeto mtua,na huku kichekelea
   Tongoa uwe suria,anenalo kitendea
   Mchago wako murua,imara wajiwekea
   Harufu inowadia vikuba vinonukia.



7. Ndwele ya nyumbani kwako,sitara waiwekea
   Ubungo iwe ni mwiko,kukusanya hadhiria
   Waramba kisogo chako,huku wakichekelea
   Harufu inowadia vikuba vinonukia.



8. Hewalla kubwa kauli,harufu yako nzuri
   Isiwe tena kivuli,ukaharibu uzuri
   Tohoa usikejeli,elimu ya ushazari
   Harufu inowadia,vikuba vinonukia.



9. Utote tote mluwa,vilua vyake murua
   Kila pembe ina uwa,la waridi lachanua
   Vikuba ukichukuwa,baridi vinonukia
   Harufu inowadia vikuba vinonukia.



10. Harufu tete ya pete,ngodani kichekelea
    Kachiri ndani ya fete,kitoto kisherekea
    Harufu doa lifute,nzuri inonukia
    Harufu inowadia,vikuba vinonukia.



11. Nyamala mwana kulia,mwanangu mekuridhia
    Nyamala mwana tapoa,kheri ikikujilia
    Nyamala mwana najua,vikubwa unaumia
    Harufu inowadia,vikuba vinonukia.

SALMA KHAMIS