|
|
Kabla ya Macho Yangu
Date: 16 June 2003
-
Naomba siniamshe, niwache usingizini
Ndoto niikamilishe, kiwa kwako ubavuni
Wala sinikurupushe, ikaniruka kichwani
Nisaidiye isishe, nionayo niamini
-
Nilikuona zamani, kabla ya macho yangu
Ukabakiya moyoni, huku nikiomba Mungu
Nikutiye mikononi, nikupe umri wangu
Leo hii naamini, siku imefika kwangu
-
Tumevaana mwilini, kwa shauku na furaha
Mioyo iliyo ndani, yatupiga na kuhaha
Kigongana kifuani, na pupa isonasiha
Tukipeana hanani, mapenzi yalo na raha
-
Uzuri mithili yako, sijaona duniani
La fakhari umbo lako, na urefu wastani
Unang'ara uso wako, kama mwezi wabaini
Napenda bashasha zako, ucheke nnatamani
-
Sura yako nimevikwa, imenijaa machoni
Sitokubali kushikwa, kuumizwa zangu mboni
Takulinda hutofikwa, paziya lako kopeni
Yatapokuja pofukwa, wewe utakuwa ndani
Salama huonekani
Maher
|
