Naitamani Sauti!

Date:  09 Feb 2003

1. Ndege uliye angani, Kiringia hewani
   Sauti yenye kughani, inaponitoa ndani
   Nikaapo dirishani, Isishe nnatamani.
2. Urukapo kwa madaha, asubuhi na jioni
   Sauti yenye furaha, hupita masikioni
   Nami huona raha, isimalize natamani.
3. Napenda yako sauti, aliyokupa Manani
   Nami nikaja kititi, kubaini yako shani
   Mola kakupa sauti, nzuri naitamani.
4. Ndege wanibembeleza, asubuhi na jioni
   Nami sina cha kuwaza, Nikuonapo waghani
   Sauti huniliwaza, Kunitoa majonzini.
5. Ndege nakuomba pita, jioni imewasili
   Mazuri yakufuata, Sauti meisabili
   Mikono imefungata, mtama wakusubiri.
6. Moyo meingiwa wahka, njoo mbawa zako mbili
   Hakuna ataekupa, Mazuri nakusaili
   Kubwa ndani kukufunga, nje uione mbali
   Usiwe na mhimili.
7. Ushindwe pa kupapasa, mti uuone mbali
   Urudi ninakuasa, Tizama yaliyo mbali
   M-baya akikunasa, atakukata kilimi
   Usiweze na kughani.
8. Ndege meumbiwa anga, Utandie na ughani
   Usiwe ndege kubanga, alojitoa thamani
   Akashindwa ya kupanga, akaleta tafrani.
9. Ndege uliye adhimu, Sauti yako ni tamu
   Asubuhi wasalimu, Jioni nayo timamu
   Umeumbwa na KARIMU, Sifa usiituhumu
   Sauti yako ni tamu, Njoo unikirimu.
10. Imba unipe raha, na uruke kwa furaha
    Macho yenye madaha, yakuangaze kwa raha
    Moyo mejawa furaha, Natamani zako raha.
11. Njoo unipe furaha, Kwa sauti ya madaha
    niokoe na fadhaa, Dirisha nilipokaa
    Kimya chako si ridhaa, Na si yako khulka.
12. Au kama mekosea, Sina budi kukwambia
    Samahani ipokea, Moyo wako ufumbua
    Ndege unayeenziwa, Au Hajj umekuwa?
    Umenipa mazowea, Nashindwa kujitambua.
13. Sauti yako ni neema, ni dua kwa masikini
    Asubuhi ukinena, Mchana nauthamini
    Jioni ukiitema, Kwa nyimbo zenye thamani.
14. Sili nisipokuona, Ukirukia angani
    Moyo unasonona, Sauti naitamani
    Ndege ninakutamani, Sinitie hamkani
    Nipo hapa dirishani, macho kiangaza hewani.

 

Chama