|
|
Yasikutie Uchungu!
Date: 23 Oct 2002
- Sisikitike mwenzangu, hayo mambo ya kupita
Yasikutie uchungu, ukikaa ukijuta
Wewe muachiye Mungu, na yeye yatamkuta
Arudi kukutafuta
- Si wote wenye kinaa, kiwapa wakatosheka
Wengine wana tamaa, kubwa isio semeka
Huwa kama wenye njaa, roho huwapaparika
Imani ikawatoka
- Huzisahau hisani, roho zikabadilika
Wakawa mafirauni, kutenda yaso mipaka
Si kwa siri,majiani, bila haya hufanyika
Ukiona tashituka
- Khofu kwao huwatoka, huhamkwa hadharani
Kwa kejeli na kucheka, nawe ukawa huoni
Pale utapo shituka, mali iko kwa jirani
Hujuwi ufanye nini
- Dalili ni tangu mwanzo, mapenzi hakuwa nayo
Bila ya shaka ni chanzo, chake akawa mchoyo
Ana mengi matatizo, kwa hali hiyo aliyo
Wakupenda huyo siyo
- Nawe fanya umetupa, kitu kisicho thamani
Na vyote ulivyompa, vibaidishe moyoni
Huku siku unazipa, atakutoka yakini
Atajuwa wewe nani
Maher
|
