Binaadamu Bora Mimi

Date:  16 May 2004

Wana-Zanzinet na Wapenzi wa Mashairi,

Assalaam alaykum.

1. Boramimi bin'adamu, napenda jiweka kati
   Na kutukuza isimu, yangu bila ati ati
   Na kujiona muhimu, wengine wote makuti
      Udhaifu mtikati, boramimi bin'adamu
2. Na ile yangu kaumu, taisomea kunuti
   Ibariki na kudumu, kuishinda Imarati
   Ndiyo jamii adhimu, taibeba kitikiti
      Udhaifu mtikati, boramimi bin'adamu
3. Kila ninapostakimu, ninachunguza kwa chati
   Ni nani mwenye kukimu, wa mali na nyingi noti
   Nani mwingi wa elimu, nani mbovu wa goti
      Udhaifu mtikati, boramimi bin'adamu
4. Nitatafuta kwa hamu, wasifu na zao nyeti
   Mali mwenye kuhizimu, tamheshimu kwa dhati
   Ama akinidhulumu, tamchomea baruti
      Udhaifu mtikati, boramimi bin'adamu
5. Mwenye nguvu taheshimu, lakini tajizatiti
   Na hata kama sitimu, urefu wa tatu futi
   Hilo halijawa gumu, taongezea majiti
      Udhaifu mtikati, boramimi bin'adamu
6. Kijaaliwa fahamu, nikasoma darasati
   Ninajiona mwalimu, mjuzi wa kila hati
   Wengine wote mabomu, tawakanyaga kwa buti
      Udhaifu mtikati, boramimi bin'adamu
7. Na yule alonisumu, katu sitomsaliti
   Tamuenzi mahmumu, yeye wangu mwanasiti
   Yeye ndie muadhamu, sitofanya tashtiti
      Udhaifu mtikati, boramimi bin'adamu
8. Tamuenzi nimchumu, hata kama simpati
   Sifaze tatarakimu, pasi kukosa wakati
   Tamwandalia karamu, nimpe na yangu voti
      Udhaifu mtikati, boramimi bin'adamu
9. Hata wengi kilaumu, swahibuyo afiriti
   Ndipo nitapoazimu, kumjaza kalafati
   Katu hamnikhasimu, na huyu wangu banati
      Udhaifu mtikati, boramimi bin'adamu
10. Lakini nisomhamu, katika huu umati
    Hata akijaza fomu, awe wangu hazarati
    Tatamani mpa sumu, yamfikie mauti
       Udhaifu mtikati, boramimi bin'adamu
11. Wewe mwana wa Adamu, wabweka wala hujuti
    Waabudu ya nujumu, na ubinafsi huwati
    Humchi Mola Karimu, hadi uwe makhtuti
       Udhaifu mtikati, boramimi bin'adamu
12. Mezoea kuhukumu, na kuzigawa jamati
    Uyaonayo matamu, yatafikia tamati
    Ndipo itapolazimu, safari bila tiketi
       Udhaifu mtikati, boramimi bin'adamu
13. Niliyotongoa humu, si sera si mikakati
    Si hoja wangu wa damu, kuafiki zangu beti
    Ninaibwaga kalamu, sasa nakwenda kuketi
       Udhaifu mtikati, boramimi bin'adamu

Maa salaam.

Kassim