Date: 22 November, 2004

Nimelipenda sana shairi hili kwa kitu kimoja: beti ya mwisho imekusanya maudhui yote ya beti tatu za mwanzo kwa ustadi mkubwa sana! Hapa ndipo, chambilecho waingereza, wanapotafautishwa, "boys from men"!

Hili shairi ni zito kama nanga ya meli! Mtindo huu sijapata kuuona kwenye mashairi yote niliyowahi kuyasoma. Na ujue kuwa nimeshasoma mashairi mengi sana! Mtindo huu wa kuandikwa beti kama chane za ukili - ubeti mmoja mmoja, kwa maudhui yake - kisha zikapakaswa chane hizo zikaingia zote kwenye ubeti (ukili) mmoja wa mwisho, hakika umenifurahisha sana!

Hassan Omar Ali

Dallas.

NATAMANI

1. Madamu maji mtoni , Daima yachuruzika
   Hata na ije tufani , Mwishowe huburudika
   Mto kwa kujiamini , Kwa pozi huteremka
   Na pendo langu jamani , Hasha halitanyambuka
   Mto kaukausheni , Ndiyo pendo takauka
2. Madamu bustanini , Mauwa yanachanuka
   Jua na mvuwa si shani , Mauwa yatachipuka
   Vipepeo kitaluni , Haweshi kurukaruka
   Na pendo langu juweni , Muhali kupukutika
   Bustani zivunjeni , Ndiyo pendo tavunjika
3. Madamu nyota angani , Kote zimechawanyika
   Hata lije wingu gani , Mwisho wingu huondoka
   Nyota hubaki makini , Huzidi kunawirika
   Na pendo langu yakini , Katu halitotoweka
   Nyota kaziangusheni , Ndiyo pendo taanguka
4. Nikupendae moyoni , Powa usitie shaka
   Kwenye mto ukingoni , Nakusubiri kufika
   Twende kwenye bustani , Pendo lizidi pambika
   Na huku nyota mbinguni , Sisi zinatumurika
   Natamani natamani , Siku ifike haraka

KIITIKIO

Nikupendae moyoni , Powa usitie shaka
Natamani natamani , Siku ifike haraka

Shairi : Saleh M. Barkey