RABI TWEPUSHE NA NARI

Date: 04 November, 2004

1. Hamdu za Maulana, Muumba janna na nari
   Wokovu Ya Rabbana, maasi yamekithiri
   Viumbe twatafunana, kimetuzidi kiburi.
   Yatuaga Ramadhani, Rabbi twepushe na Nari.


2. Kumi la mwisho mwungwana, jiweke mbali na shari
   Ya shetani mwenye lana, asi wa Allah Qahari
   Atujia kwa mapana, kuzishawishi suduri
   Yatuaga Ramadhani, Rabbi twepushe na nari.


3. Tutiye moyo dhamiri, tusijifanye hodari
   Jahanamu kali nari, huwakumba majabari
   Huchoma na kuadhiri, wakosefu makafiri
   Yatuaga Ramadhani, Rabbi twepushe na nari.


4. Saumu ituathiri,tutubu dhambi tukiri
   Wanojitia ghururi, Haawiya yawasubiri
   Watachomwa matajiri, wa inda wenye viburi
   Yatuaga Ramadhani, Rabbi twepushe na nari.


5. Nyoyo zikose sururi, kuasi si ufakhari
   Pokea langu shauri, sijitie ujabari
   Mja ngia tahayuri, hakuna jambo la siri
   Yatuaga Ramadhani, Rabbi twepushe na nari.


6. Mwenzangu ngia nadhari, utende lilo la kheri
   Tambua Mola Qahari, yuko nawe huna siri
   Alijua la dhahiri, na la batini vizuri
   Yatuaga Ramadhani, Rabbi twepushe na nari.


7. Jahanamu yavinjari, yawangoja majeuri
   Na wale wasofikiri, wapenda umashuhuri
   Wala hawangii ari, kurejea kwa Ghafuri
   Yatuaga Ramadhani, Rabbi twepushe na nari.


8. Wakiasi hawajali, wapenda sifa titiri
   Nyoyo kama majabali, kamwe hazingii nuri
   Hawasimami kusali, wamwasi Allah dhahiri
   Yatuaga Ramadhani, Rabbi twepushe na nari.


9. Nakhatimisha qauli, kiyama siku hatari
   Funga ziwe maqubuli, hiyo siku ya hashiri
   Twakuomba ya Jalali, Ya Alimu ya Jabbari
   Yatuaga Ramadhani, Rabbi twepushe na nari.

Ahmed Rashid.