YUWAJA MGENI WETU

Date: 28 September, 2004

1. Ya Allahu ya Karimu, Rahimu ya Rahmani
   Ya Rabi Mola Adhimu, hamdu zako Manani
   Amani kwa muadhamu, Rasuli wa tumaini
   Yuwaja mgeni wetu, kipenzi chetu azizi.


2. Naikumbusha qaumu, habibu yuko njiani
   Ni johari mahashumu, waridi la busitani
   Fakhari ya Isilamu, dhahabu tuitunzeni
   Yuwaja mgeni wetu kipenzi chetu azizi.


3. Wekuja musitaqimu, wajumbewe barazani
   Kuitangaza saumu, Rajabu na Shaabani
   Tukawaona ni sumu, ujinga metuzaini
   Yuwaja mgeni wetu, kipenzi chetu azizi.


4. Tujiandae muamu, kukaribisha mgeni
   Tujongee kwa Rahimu, kwa tahajudi nyumbani
   Tujipambe kwa saumu, na sala misikitini
   Yuwaja mgeni wetu, kipenzi chetu azizi.


5. Tusingoje baragumu, tukajajuta usoni
   Qiyama siku ni ngumu, liqau kwa Rahmani
   Anza sije jilaumu, kesho kesho hadi lini
   Yuwaja mgeni wetu, kipenzi chetu azizi.


6. Inawirishe kaumu, msifika Ramadhani
   Twakusubiri kwa hamu, pingu atiwe shetani
   Fika baki humu humu, siende twakutamani
   Yuwaja mgeni wetu, kipenzi chetu azizi.


7. Sabau kwa hii zamu, beti chache nabaini
   Ramadhani tufahamu, tu wageni wa Manani
   Vipi tumekosa hamu, hatufungi Shaabani?
   Yuwaja mgeni wetu, kipenzi chetu azizi.

Ahmed Rashid.