Ameumbwa Malkiya

Date:  25 July 2005

1. Karibu ya yangu macho, mbele kanisimamiya
   Na kila alicho nacho, kamili kimetimiya
   Amira hana kificho, peke yake malkiya


2. Dunia ameumbiwa, aiamuru ni yake
   Na taji alilopewa, halina mfano wake
   Kichwani katunukiwa, vito vyote pambo lake


3. Vingi visivyo idadi, vinashindana kung'ara
   Almasi zumaridi, kama nyota zake sura
   Yakuti zabarijadi, zimeshikana imara


4. Yake shingo menyo'oka, dede imemsimama
   Kifua kisicho shaka, kimemnyanyuka wima
   Kimwana ameumbika, huchoki kumtazama


5. Uso umemkunjuka, amejawa na bashasha
   Anakenya mkicheka, jambo la kufurahisha
   Hasa panapo dhihaka, na meno hukuonesha


6. Mungu kampa kipawa, hadhi yake kumuona
   Kwa uzuri alopewa, hamna wa kufanana
   Mrembo wa kushtuwa, mtoto bado kijana

Maher ( Unique )