|
|
BIBI NA BWANA
Date: 30 March 2004
-
Furaha furaha sana, furaha bibi na bwana
Ni ambari na zinduna, mapenzi mulovishana
Mikono mukishikana, munapendeza vijana
Mushakamilisha suna, kwa baraka za Rabana
-
Nyoyo mukisafiana, mazuri kuambizana
Siri zenu kuzibana, na bashasha kupeana
Pia kusubiriana, kosa kusameheana
Mutazishinda fitina, mutazidi kupendana
-
Muzidi kufungamana, kwa raha kunyunyizana
Muruzukiwe na wana, waume kwa wasichana
Muishi kusikizana, penye shida au ghina
Hadi kukhitimishana, peponi mwende kutana
KIITIKIO
Furaha bibi na bwana, mushakamilisha suna
Ni ambari na zinduna, mapenzi mulovishana
SHAIRI : SALEH M. BARKEY
|
