Bofulo Siri Nataka

Date:  8 October, 2005

1. Bofulo nimekumbuka, nimekumbuka nyumbani
   Na mengi yalotendeka, na visa vya bekarini
   Visa vya wenye kuoka, na walaji taireni
   Nauliza nijuvyeni, bofulo siri nataka


2. Wapi utamu watoka, mwenzenu mimi sioni
   Nijuvyeni si dhihaka, na siri ya mtumbwini
   Vipi unga kupondeka, kwa kuchovywa miguuni
   Nauliza nijuvyeni, bofulo siri nataka


3. Toka dakhari na kaka, bofulo ipo nchini
   Imedumu kwa miaka, mehimili ushindani
   Meliwa na kila rika, asubuhi na jioni
   Nauliza nijuvyeni, bofulo siri nataka


4. Na huko tulikotoka, mkate huu wa shani
   Ilikuwa ni mashaka, kuutia mkononi
   Wengi tukisononeka, kuukosa majumbani
   Nauliza nijuvyeni, bofulo siri nataka


5. Kama wewe si kikaka, utakaa msongoni
   Hata mbele ukifika, hutaamini machoni
   Mikate 'memalizika, haya sasa ondokeni
   Nauliza nijuvyeni, bofulo siri nataka


6. Songambele na shirika, Furaha ya Visiwani
   Namna gani mwapika, mikate hii jamani
   Jee ni kweli hakika, ufundi si wa wageni?
   Nauliza nijuvyeni, bofulo siri nataka

Kassim O. Ali

Bofulo Siri Nataka

Date:  10 October, 2005

1. Kunena sifa ya mja, vitendo vya muungwana
   Mti shina ndio haja, bila ringi gari huna
   "Boya" ndio maharaja, kinyume bofulo huna
   Kahani kuambizana, siri bado haijaja.


2. Diriki kuni korija, na tanuri la aina
   Uwe fundi wa vioja, uliyepevukiana
   "Boya" ndio lenye haja, Si hivyo uanze tena
   Tujuvye tukijuvyana, siri bado haijaja.


3. Unga bora wa kutaja, uwe nao wa aina
   Na mafuta ya kufuja, na ya nazi za kukuna
   "Boya" vibaya likija, safari ianze tena,
   Tuambe kiambiana, siri bado haiaja.
4. Siri bado kuitaja, Wala si kwayo hiyana
   Mbili si moja na moja, wa mangungu wajuwana
   Mkwijini si kuvuja, Fomula never kuona
   Siri bofulo wanena, ni ya mafundi kangaja.

Omar Fakih, Gwangju (RoK).