|
|
Chakupewa Tukumbuke
Date: 27 May 2005
Ewe bwana Chakupewa, uko wapi mepoteya
Mwaka sasa umekuwa, tangu nime kusikiya
Au huko umepewa, mambo yame kunogeya
Ukenda hata kutowa, kwaheri ukatwambiya
Unique
Chakupewa Tukumbuke
Date: 27 May 2005
Enenda kote wendako, jongoo, jiti situpe
Angalia utokako, Chakupewa ni kweupe
Sienende koko hoko, jicholo nasi utupe
Wenzako usitutupe, tukumbuke wenzi wako
Ahmed Rashid
Chakupewa Tukumbuke
Date: 27 May 2005
Halahala Chakupewa, haifai kukimbia
Pengine umezidiwa, na mambo ya kidunia
Na katu haitokuwa, we kazi kukuishia
Mugwana usitutupe, tukumbuke wenzi wako
M. Simba
Chakupewa Tukumbuke
Date: 27 May 2005
Wenzio wakuthamini, ujijue cheo chako
Unajifichia nini, ukatukhini wenzako
Hebu rudi uwanjani, lipunguze hilo deko
Nakuasa situtupe, tukumbuke wenzi wako
Saleh Barkey
Chakupewa Tukumbuke
Date: 28 May 2005
-
Ujumbe niloupata, hauna dowa hakika
Siku nyingi zimepita, Namimi sikusikika
Sikuwa kwenye matata, Kwalo nimenusurika
Ningeweza hata nyata , Kwa hilo nahuzunika
-
Kwaheri sikuitowa , kwa vilebado sijenda
Mambo yalinichukuwa , muda wangu ulikonda
Kila hijipapatuwa , seyafika hata kenda
Vizuri kunishtuwa , Na huko ndiko kupenda
-
Ahsante Ikhwani , hakika nyinyi wakweli
Nitarudi uwanjani , zaidi kwa kulahali
Wallahi nakutamani , Niwaone mafahali
Mumenitia thamani , Sidhani nastahili.
Chakupewa
Chakupewa Tukumbuke
Date: 28 May 2005
-
Tulihuzunika sana, kututoka uwanjani
Tukawa twaambizana, mwenzetu kafikwa nini
Kahama bila kunena, akatwacha tumbioni
Kwa upande wangu sina, memaliza mitaani
- Wa Rashidi Ahmedi, henenda na mbio zake
Salehe akashtadi, tuhimu tuhangaike
Ili upate kurudi, uwanja uchangamke
Tukawa twabisha hodi, kila mlango na wake
- Hakuna tuliyo acha, nyumba tulizimaliza
Yetu khofu mejificha, kuona twakuchagiza
Ndugu zako wakachacha, na uvumba kufukiza
Juu ya wetu mbacha, mpaka mengia kiza
- Leo tumefurahika, mwenzetu umechomoza
Ndugu yetu umefika, ya dhiki ume yapoza
Tulikuwa tumechoka, moyo ikituunguza
Kuona umeondoka, na kubaki tukiwaza
Unique
Chakupewa Tukumbuke
Date: 28 May 2005
- Kweli tulihuzunika, zama liponyerereka
Muhibu tulikusaka, pori, msitu na nyika
Yuko wapi mtajika, Chakupewa msifika
Tenda utalolitenda, usitutupe wenzako
- Kama yakikupalia, mate lipokitamka
Ila tukisimulia, mwenza wapi katoweka
Vyano vilituishia, ruhani hakuzumbuka
Tenda utalolitenda, usitutupe wenzako
- Mahiri hongera Bwana, kutoa nyoka pangoni
Hata kilima ngenena, Chakupewa mhisani
Roho zingetulizana, ungezuka muangani
Tenda utalolitenda, usitutupe wenzako
Ahmed Rashid
|
