NYUKI

Date: 11 September, 2005

Shairi hili la NYUKI nililetewa na Sk. Khamis bin Nassor Al-Nabhani Mola amrehemu kabla ya kufariki kwake. Ameeleza kua mtungaji wa shairi hili ambae ni mshairi wa enzi zake za zamani hakutaka jina lijulikane na wengi na ndio maana hakulieneza kwa watu wengi. Kabla kufariki kwake Sheikh Khamis, Mola amrehemu, alisema ndio maana hivi sasa katika kisiwa cha Pemba utalikuta shairi hili kwa watu wawili nao ni yeye mwenyewe na Sarhan bin Matar.

1. Mambo ya juzi Selemu, Amma hayawasifiki
   Hicho ni kisa adhimu, Wala mwerevu hacheki
   Waarabu mahashumu, Vidudu kuwahiliki
   Kumbe kukimbia nyuki, Mashekhe mbio ni bora


2. Vita vya nyuki vigumu, Nakhiyari vya bunduki
   Waja hawana salamu, Wala hawanasihiki
   Wakitokea karamu, Kataani hailiki
   Kumbe kukimbia nyuki, Mashekhe mbio ni bora


3. Tulitaraji wageni, Saa mbili hawazuki
   Wote wako mibiyeni, Wanazama kama diki
   Baadhi ya ariyani, Libasi haziwaviki
   Kumbe kukimbia nyuki, Mashekhe mbio ni bora


4. Walinipita kikundi, Shekhe Salimu na Muki
   Wakaingia kwa fundi, Kilango hakisinduki
   Wakaumwaga mtindi, Na majungu ya samaki
   Kumbe kukimbia nyuki, Mashekhe mbio ni bora


5. Na qadhi bwana Nasoro, Musemae hashituki
   Akipata uchochoro, Uchanja haualiki
   Alienea michoro, Kwa mashimo na masiki
   Kumbe kukimbia nyuki, Mashekhe mbio ni bora


6. L-akhi bin Majidi, Musemae hakunjuki
   Ajidai majuhudi, Enda kwa punda hashuki
   Dharura ikimbidi, Enda mbio hashindiki
   Kumbe kukimbia nyuki, Mashekhe mbio ni bora


7. Bwana wa Kizuiyani, Mwajuwa simdhihaki
   Ejitupia majani, Wala hayamfuniki
   Nilimkuta njiani, Unaziba muiliki
   Kumbe kukimbia nyuki, Mashekhe mbio ni bora


8. Aidha bwana wa Tungwe, Ni mrembo haondoki
   Leo pakilia n'gongwe, Kataa hapamueki
   Alitambaa na bonde, Hadi rasi ya pichiki
   Kumbe kukimbia nyuki, Mashekhe mbio ni bora


9. Vilikutana vipungo, Kupungwa bwana Lemki
   Nyuki kaipa mgongo, Wala hakutaharuki
   Na vile kutoa shingo, Akenda kama hataki
   Kumbe kukimbia nyuki, Mashekhe mbio ni bora


10. Tamma bin Ibrahimu, Kila epiga falaki
    Esema hayatadumu, Efanya kama hataki
    Ilishtadi zihamu, Pasiwe alamsiki
    Kumbe kukimbia nyuki, Mashekhe mbi ni bora

Limetwa na Saleh Barkey