Kuna Siku Yatakwisha

Date:  11 December, 2005

1. Mungu atupe subira, na nyingi stahmala
   Itushukie nusura, wahizike zao hila
   Iwangie khofu mara, iwatoke kwa ghafula
           Kama ndoto walo lala
2. Yana tutia uchungu, kila mara tukiona
   Kupigwa watu virungu, hata sababu hapana
   Wanatugawa mafungu, kwa chuki zisizo mana
           Kwa hili hamtapona
3. Huku kutu dhalilisha, nako kuna mwisho wake
   Kuna siku yatakwisha, yaondoke yende zake
   Hawatodumu maisha, Mungu ana siri yake
           Tusubiri tusichoke
4. Wangapi wameondoka, wameiaga dunia
   Walio wakidhihaka, majumba kutuvunjia
   Wakapita wakicheka, mabaya kufurahia
           Hawapo wamejifia
5. Hapa palipo bakia, padogo simbali tena
   Muhimu kuvumilia, machungu tunayoona
   Tuwe shujaa wa nia! , pamoja kushikamana
           Tuangaze mbele sana

Maher ( Unique )

Kuna Siku Yatakwisha

Date:  12 December, 2005

1. Usemayo nawafiki, yatakwisha masahibu
   Masahibu na mikiki, kuteswa bila sababu
   Sababu kudai haki, kudai bila harubu
           Harubu si mwendo wetu
2. Yatakwisha ya dhuluma, na watu kuadhibiwa
   Kuadhibiwa kwa chama, wengi walokichaguwa
   Walokichaguwa vyema, sio kulazimishiwa
           Kulazimishiwa na wasio wetu
3. Watu sasa wamechoka, na matumizi ya dola
   Dola ilojipachika, kwa mabavu kutawala
   Kutawala kwa shabuka, na majeshi wasolala
          Wasolala kwa hofu ya umoja wetu
4. Matumizi ya mabavu, ndio kubwa yao ngao
   Ngao yetu utulivu, hatujali nguvu zao
   Zao nguvu za uovu, hazilindi roho zao
           Roho zao, mjuzi ni Mola wetu
5. Kubwa wanaloliweza, ni kuchelewesha siku
   Siku ya Mola muweza, alopanga tuwapiku
   Tuwapiku kuongoza, hakuna mtafaruku
          Mtafaruku wa nani kiongozi wetu

Kassim O. Ali