Kukimbia Nyuki

Date: 30 November, 2005

1. Asadi etuhiliki, Kwenda tukumbusha leo
   Mbona wengine hataki, Afanya mapendeleo
   Au ni mtu wa chuki, Ataja watu kwa vyeo?
   Kweli Kukimbia Nyuki, Mashekhe Mbio ni Bora


2. Pee na Mchina Tambi, Na huyu hukumtaja
   Makumba etoka Bambi,Alojifunga mkaja
   Ekuja siku za kambi, Kudondoa moja moja
   Kweli Kukimbia Nyuki, Mashekhe Mbio ni Bora


3. Asadi usisahau, Au wajikurupusha?
   Na ikiwa ni dharau, Neepo nakukumbusha
   Hiyo siku ya pilau, Ndama tulipoangusha
   Kweli Kukimbia Nyuki, Mashekhe Mbio ni Bora


4. Kama malenga njoo, Tena takupa na noti
   Mustafa Abdoo, Fundi dereva wa boti
   Echota wali kwa ndoo, Na Athumani makoti
   Kweli Kukimbia Nyuki, Mashekhe Mbio ni Bora


5. Alokabidhiwa supu, Sulemani Mkojani
   Hawi mikono mitupu,, Eujaza pakachani
   Ana watoto gurupu, Wamngojea nyumbani
   Kweli Kukimbia Nyuki, Mashekhe Mbio ni Bora


6. Ee Moh'd Khamisi, Mugheri washindwa kazi
   Wajidai udadisi, Kwenda wasema wazazi
   Wabakia mufilisi, Kutaja wote huwezi
   Kweli Kukimbia Nyuki, Mashekhe Mbio ni Bora


7. Basi nitakutajia, Tena mmoja mmoja
   Wa mwanzo aloingia, Buda Baniani koja
   Na mbeba sufuria, Kijasho Kinamtoja
   Kweli Kukimbia Nyuki, Mashekhe Mbio ni Bora


8. Akaja na babu yangu , Ati enda na wenziwe
   Alonambia mwanangu, Selemu leo ingiwe
   Tuache bodo na changu, Msi mwana lake jiwe
   Kweli Kukimbia Nyuki, Mashekhe Mbio ni Bora


9. Wamjuwa Koti nje, Au hujamsikia
   Bwana akipenda punje, Nyali akifuatia
   Ni karibu azionje, Nyuki wakamrukia
   Kweli Kukimbia Nyuki, Mashekhe Mbio ni Bora


10. Na kina mama kaumu, Wengi walihudhuria
    Kirongozi Bisaumu, Ama huyu twakambia
    Euna kama sumu, Wali akaukimbia
    Kweli Kukimbia Nyuki, Mashekhe Mbio ni Bora


11. Na mwalimu wa sukuli, Alokuja na mwanawe
    Alimpiga chuchuli, Kamwambia usinawe
    Hawa si nyuki ni nduli, Wataka roho watwawe
    Kweli Kukimbia Nyuki, Mashekhe Mbio ni Bora


12. Nikifika thinashara, Aghlabu siongezi
    Mana sina mshahara, Na wala hii si kazi
    Lakini leo tan'gara, Japo nikose mchuzi
    Kweli Kukimbia Nyuki, Mashekhe Mbio ni Bora


13. Ni mambo ya mwaka huu, Na wala hayatajiki
    Nakumbuka Mabuluu, Ni mkali hafikiki
    Al-Bahri yu juu, Kipangani "Si riziki”
    Kweli Kukimbia Nyuki, Mashekhe Mbio ni Bora


14. Kibwanga chesalimika, Si mtu wa kuokota
    Alikuwa yu Msuka, Ana gari akokota
    Naye angekaza shuka, Kwa tumbo kumsokota
    Kweli Kukimbia Nyuki, Mashekhe Mbio ni Bora


15. Na Awadhi Mshihiri, Ee jamani ni mambo
    Afadhali kumsiri, Ndiye fundi wa mitambo
    Wanzake walikithiri, Walimfanya ni chambo
    Kweli Kukimbia Nyuki, Mashekhe Mbio ni Bora


16. Huyu tulikwishajua, Kuwa yeye nuksani
    Ee auza halua, Anunue kitu gani
    Ni kuwa zimpungua, Wakutiwa gerezani
    Kweli Kukimbia Nyuki, Mashekhe Mbio ni Bora


17. Ama Amuri wa Konde, Gando si kwao asili
    Aliyakata mabonde, Tena kwa dakika mbili
    Wacha matope aponde, Udhani hana akili
    Kweli Kukimbia Nyuki, Mashekhe Mbio ni Bora


18. Mapicha asiye hoja, Mtu wa Majimbikani
    Ni bado kujikongoja, Ati yeye ni jirani
    Asema kwanza angoja, Pilau ije nyumbani
    Kweli Kukimbia Nyuki, Mashekhe Mbio ni Bora


19. Kabwera bado mdogo, Na tena anachechea
    Kazi kuchoma muhogo, Na nguru kutoela
    Pahala palipo zogo, Asema hakuzoea
    Kweli Kukimbia Nyuki, Mashekhe Mbio ni Bora


20. Latubi wake usugu, Ekataa kukimbia
    Mtu huyu hana ndugu , Pemba na Unguja pia
    Yeye ajifanya njugu, Alijivika gunia
    Kweli Kukimbia Nyuki, Mashekhe Mbio ni Bora


21. Chumbuni na Pakashume, Hata Mdabi wa Bule
    Walijifanya vidume, Lazima wali waule
    Basi wache wangurume, Nyuki wapata tungule
    Kweli Kukimbia Nyuki, Mashekhe Mbio ni Bora


22. Chani etoka Limbani, Na bakora mkononi
    Epita njia za ndani, Hakupitia sokoni
    Basi efika Pandani, Njia ya kwao haoni
    Kweli Kukimbia Nyuki, Mashekhe Mbio ni Bora


23. Najuta kukulaumu, Mana ni wengi siweshi
    Kule kufanya ugumu, Ni bure hatuchokeshi
    Kumbe viumbe wagumu, Asonacho hakopeshi
    Kweli Kukimbia Nyuki, Mashekhe Mbio ni Bora


24. Sasa nisifu karamu, Wali ulivyopikika
    Na nyama ilivyo tamu , Ukigusa yamezeka
    Kwa samli kemkemu, Yatoja ikianguka
    Kweli Kukimbia Nyuki, Mashekhe Mbio ni Bora


25. Tonge bila ya mpango, Usitafune wameza
    Machaza na machinyango, Sio muengo wa pweza
    Kutwa uwazi mlango, Bwana Issa etuweza
    Kweli Kukimbia Nyuki, Mashekhe Mbio ni Bora


26. Ela wawapi walaji , Wote washapiga mbio
    Baki kuponea maji, Hapakupikwa vijio
    Betri hazina chaji, Lala usage sikio
    Kweli Kukimbia Nyuki, Mashekhe Mbio ni Bora

Kutoka gazeti la Istiqama, mtungaji hajulikani
Limetwa na Suleiman Al Abdely