Kukimbia Nyuki

Date: 02 December, 2005

1. Hazikuwa tungo zangu, zangu hazina vihere
   Nalalama kwa uchungu, Salehe hewe taire
   usitutwange mizungu, ukanivisha shemere
   Kweli Kukimbia Nyuki, Mashekhe Mbio ni Bora


2. Yalotokea Selemu, yalihanikiza Wete
   Nyuki walifata tamu, ilosongwa na Mapete
   Yeye ni watakarimu, wa akidi na wa fete
   Kweli Kukimbia Nyuki, Mashekhe Mbio ni Bora


3. Mahiri kawa kidumu, asema asolijuwa
   Kasikia kwa mwalimu, Saidi wa Madaniwa
   Pariwala yu wa damu , kwa pilau utapowa
   Kweli Kukimbia Nyuki, Mashekhe Mbio ni Bora


4. Wakafika wahudumu, kwa austini ya chani
   Wakazidi pata hamu, walotokea Limbani
   Likapigwa baragumu, bondeni na Kipangani
   Kweli Kukimbia Nyuki, Mashekhe Mbio ni Bora


5. Bwana Juma wa Junguni, akaja kapanda punda
   Na mpwawe wa Shebani, na wakweze wa Kidunda
   Wamepania kwa kani , kusafi yaliyovunda
   Kweli Kukimbia Nyuki, Mashekhe Mbio ni Bora
6. Likaingiya gurupu, warabu wa Mkanjuni
   Hawa wazijua supu, na lozi za maruhani
   Hatoki mtu patupu, pamefikwa shughulini
   Kweli Kukimbia Nyuki, Mashekhe Mbio ni Bora


7. Bado viroja vimbali, kaja bwana Khalfani
   Mshenga wa serikali, na mwamba maarusini
   Katu ndoa si kabuli, usipompa saini
   Kweli Kukimbia Nyuki, Mashekhe Mbio ni Bora


8. Joshi likahanikiza, kwa maudi na marashi
   Rubuni wakaekeza, kwa vazi la wanawashi
   Miwani-mdogo raza, ndie alieshawishi
   Kweli Kukimbia Nyuki, Mashekhe Mbio ni Bora


9. Kanga za chapa kipanga, ndizo sare za arusi
   Palisadifu malenga, waloghani yasotusi
   Hakuna alojitenga, siku hiyo mahususi
   Kweli Kukimbia Nyuki, Mashekhe Mbio ni Bora


10. Walipopanda sahari, wanafunzi wa sharifu
    Wanotawala membari, za maulidi na dufu
    Wazoefu wa viriri, kwa kasida usikhofu
    Kweli Kukimbia Nyuki, Mashekhe Mbio ni Bora


11. Ndipo tulipokisia, kuwa ya kale nadhifu
    Kwani yaliashiria, kwenye safu ya machifu
    Maami walotulia, mashekhe waadilifu
    Kweli Kukimbia Nyuki, Mashekhe Mbio ni Bora


12. Kina Sudi wa Mponda, na Abedi Daftari
    Shununi wa njia panda, na Yasini Daktari
    Hapo mambo yaliwanda, Pilau wakasubiri
    Kweli Kukimbia Nyuki, Mashekhe Mbio ni Bora


13. Mara kiwingu chatanda, si cha maji ni cha shari
    Wadudu walipotanda , hawesubiri bukhuri
    Waliyawacha matunda, na utamu wa sukari
    Kweli Kukimbia Nyuki, Mashekhe Mbio ni Bora


14. Vilivamiwa vilemba, kwenye safu mukhtari
    Mashekhe waliovimba, kwa elimu za akheri
    Nyuki waliwasirimba, kheri ikazaa shari
    Kweli Kukimbia Nyuki, Mashekhe Mbio ni Bora


15. Tulistirika sisi, tulovaa suruali
    Wakatekwa waasisii, ukapotea muhali
    Hapakuwa na jinsi, mbio ni mustakabali
    Kweli Kukimbia Nyuki, Mashekhe Mbio ni Bora


16. Mahiri kasimlia, bila hata ya kujali
    Mengi aloyasikia, hakufumba kwa mithali
    Wengine twayachukia, waungwana kawafeli
    Kweli Kukimbia Nyuki, Mashekhe Mbio ni Bora

Sultan Ahmed