Date: 13 December, 2005

Kwa wale wapenzi wa sanaa hii ya urari wa vina, na muwala wa beti na mishororo y! ake, huu ni utungo wa kiroho na kimaanawi. Tafadhalini natuusome kwa kituo.

                                          ************

                                            

                                   MWISHO NIMEFIKA

 

Mwangi unagonga, sikioni mwangu, mja kuniita, natika labeka.

Yule anopanga, kunondoa pingu, kutoa utata, nuru nawirika.

Kaja njiwa manga, zanawiri mbingu, kheri kuipata, kuusha mashaka

Ni Allah wangu Rabuka.

 

Kaondoa wingu, akili burudi, twabiki fiili, ndipo taokoka

Busitani yangu, kajaza waridi, nazo mbawa mbili, kanipa Rabuka

Udhaifu wangu, mkubwa shitadi, kanipa akili, iwe kuongoka

Ni nani Wako mithili?

 

Kanifunza panda, paa uenende, fika kileleni, twii Mtukuka

Ni wangu uwanda, napepea nende, Kwake Rahmani, nifike haraka

Nechoka kuranda, nemaliza konde, hikwama kingoni, mwisho nimefika

Kwa Nuru yangu samawi.

 

Nalijidanganya, hajipurapura, nikajipumbaza, eti sina shaka

Yakanikanganya, kuniparapara, yakanichakaza, nikafadhaika

Mja kunifinya, dunia tambara, limeniburuza, yameshanifika

Mwokozi unasi ameniokoa.

 

Nyuma sendi tena, Kwake nimesaki, sikutaki tena, dunia mashaka

Niko hai tena, ni kwa Mmiliki, moyo sifi tena, nimeshaokoka

Sinache Rabbana, mja tahiliki, nekusaka sana, mwisho nimefika

Ni Wewe tu Rabbuka.

                                                  ************

Ahmed Rashid