Nguvu za Mola

Date:  20 August, 2005

1. Nguvu zao na za Mola, Ni zipi zilo shadidi
   Kula,kunywa na kulala, Mola ndiye mfanidi
   Mwenye hekima na hila, Pia na nguvu shadidi
   Nguvu zao na za Mola, Ni zipi zilo shadidi


2. Sitaikata tamaa, Kufanikiwa muradi
   Nangojea yangu saa, Saa ya Sada na Sudi
   Dini yetu ndio taa, Yamurika mahasidi
   Nguvu zao na za Mola, Ni zipi zilo shadidi


3. Ukilea mwana mwema, Mola atampa sudi
   Nazo tumwa za rehema, Za Mtume Muhammadi
   Zitakutunza makama, Siku isiyo baidi
   Nguvu zao na za Mola, Ni zipi zilo shadidi


4. Ama wanotakaburi, Mashetani wa Biladi
   Kuna siku ya khatari, Anokwenda hatarudi
   Njia yetu ni kaburi, Njia ilo maridadi
   Nguvu zao na za Mola, Ni zipi zilo shadidi


5. Amali ulizotenda, Ndizo zinokupa kadi
   Roho itakapokwenda, Mbele ya Mola wadudi
   Utaoneshwa sana, Na hilo halina budi
   Nguvu zao na za Mola, Ni zipi zilo shadidi


6. Waliasi makafiri, Na kujitia taadi
   Wakijiona hodari, Kumtesa Muhammadi
   Roho zao zikiguri, Usiyahi utanadi
   Nguvu zao na za Mola, Ni zipi zilo shadidi

Shairi : Maalim Abbas M. Mdungi
Limeletwa na Salma Said katika Makala ya Nabwa