|
|
Kipigo kwake sawia!
Date: 17 July, 2006
- Atukanaye mamako, sawia kwake kipigo
Kwa kichwa au kiboko, mradi kiwe kipigo
Kama mwizi kwenye soko, tumia hata muhogo
Sawia kwake kipigo, atukanaye mamako
- Mfano bora Zidani, kutoa hicho kipigo
Tusi kwa mama la nini?, onyo la kweli kipigo
Ajifanyaye muhuni, komesha yake kipigo
Sawia kwake kipigo, atukanaye mamako
- Hutuzwa mcheza kwao, ukitowapo kipigo
Mfate hata makwao, masaki au kigogo
Hata alie kikwao, mpige japo kidogo
Sawia kwake kipigo, atukanaye mamako
- Kipigo kwake sawia, nasema sifanyi zogo
Wajibu nawaambia, kukitembeza kipigo
Ataijuwa dunia, akipatapo kisago
Sawia kwake kipigo, atukanaye mamako
- Nasema kweli halali, kitolewapo kipigo
Tena mamako mjali, tembeza hicho kipigo
Mpige japo kwa mbali, ajue nawe ni mbogo
Sawia kwake kipigo, atukanaye mamako
- Nafika hapa tamati , msisahau kipigo
Msiogope kamati, kutoa hicho kipigo
Karati au manati, ili mradi kipigo
Sawia kwake kipigo, atukanaye mamako
Msanif Shaaban K.
|
