|
|
Ngoma yataka matao!
Date: 26 May, 2006
- Macheza hawi kiwete, ngoma yataka matao
wala usiwe na tete, utulie kwa kituo
wala haitaki kete, ufuate michapuo
Mcheza hawi kiwete ,ngoma yataka matao
- Itabaki kujisifu, yalaiti huwa mwao
utasikia harufu, hayo si mafanikio
udume mintarafu, ndio utakiwao
mcheza hawi kiwete , noma yataka matao
- Action ni muhimu, mijadala baadae
mtaka unda hudumu, haneni kwa ajuae
itabaki kulaumu, lengo haliji milele
mcheza hawi kiwete, ngoma yataka matao
- Shati ufate midundo, sibaki kurukaruka
la sivyo kaa kando, taishia kuanguka
unapokuja mkondo, simama kwa uhakika
mcheza hawi kiwete, ngoma yataka matao
- ngoma huwa na vishindo, yabidi uwe imara
itaingia mipindo, usifanye masikhara
Hamadi kwenye kibindo, silaha huwa ishara
mcheza hawi kiwete, ngoma yataka matao
Anonymous 282
Ngoma yataka matao!
- Ngoma haina ujuzi, haichaguwi umbile
Kwa mchezaji si kazi, ni mdundo na kelele
Haiwi kiziwi wazi, hulishika tao mbele
Akawashinda wajuzi, kwa kuona yalo pale
- Kama kiwete kilema, kusudi lako miguu
Kaa ufahamu vyema, kuna mikono ya juu
Hushika ikasimama, wala si shughuli kuu
Hawafunzwi kinamama, siwako ukumbi huu
- Hutiwa mtu kilema, akashindwa kupuliza
Na mwili wake mzima, kichwa kikampooza
Zumari yake hugoma, kwa ukwaju ulooza
Hubaki mate kutema, Mambo hakuyamaliza
- Kucheza kuruka ruka, na khatua kuzifata
Ndipo ya kweli husaka, kasi unayotafuta
Mwendo ukaengezeka, karibu ukaivuta
Ikawa mwako hakika, hufiki utajikuta
Maher ( Unique )
Mcheza hawi kiwete!
Date: 27 May, 2006
- Kiwete si maumbile, ni mapungufu fulani
aso hili ana lile, ni maumba ya manani
kuna viwete wa fani, ni hali ya Insani
Mcheza hawi kiwete, ngoma yataka matao
- Huyu mama Senkoro, siasa zimemshinda
ni kiwete wa medani, aliwekwa njia panda
Ni daktari makini, wa hospitali za kanda
Mcheza hawi kiwete, ngoma yataka matao
- Kucheza ni kubwa fani, ukae ukitambua
watu hupata nishani, kwa kuweza majukwaa
lazima ujiamini, la si sivyo tajikwaa
Mcheza hawi kiwete, ngoma yataka matao
- Kwa hili nasisitiza, kiwete sio kilema
kiwete hugizagiza, na mwingi wa kulalama
mchana huona giza, hubakia kuyoyoma
mcheza hawi kiwete ngoma yataka matao
- Kutojua si vibaya, natakiwa kujifunza
usiwe waona haya, ukenda kwa kujibanza
utaikosa hidaya, tabaki kujiliwaza
Mcheza hawi kiwete, ngoma yataka matao
Anonymous 282
Mcheza hawi kiwete!
Date: 28 May, 2006
Sasa nimekuwelewa, nini hasa lengo lako
Uliyonena ni sawa, umempata aliko
Yatokota yake dawa, epuwa juu ya jiko
Mpe chungu atapowa, umwache uwende zako
Maher ( Unique )
|
