|
|
NTAMPIGA KWA MBALI!
Date: 06 April, 2006
-
Fundi hatafuti mbili, moja ya ndani yatosha
Wala sitangi kwa hili, cha mbele huporomosha
Kama haya hukubali, kiweke takuonesha
Ntakipiga kwa mbali, kama nnakiamsha
- Iwe ndogo ya sindano, tundu ya kiasi hicho
Umbali uso mfano, kipande ukijuwacho
Sitouma yangu meno, wala kupepesa jicho
Ntakitowa kibano, kiruke kisiwe nacho
- Sisaki kwenye vichaka, kwa mshare na upinde
Langu ni pori la nyika, mkuki huwa upande
Nikirusha nihakika, wateleza na umande
Ukapiga kwa haraka, akafa na usigande
- Sasa nnakuwalika, twende sote usasini
Shuruti hutoshituka, kuyaogopa majani
Au vinopukutika, nakuanguka mitini
Tukamkamate nyoka, tumtiye guniani
- Yako ya mbali ifiche, fimbo usije muuwa
Akitoka bora mche, hapendi kukaribiwa
Usijifanye macheche, kutaka kumraruwa
Atakudhuru muwache, ana moto usojuwa
Maher ( Unique )
NTAMPIGA KWA MBALI!
Date: 07 April, 2006
- Usianze kumtisha, mfanya hapigi kelele
Alolala waamsha, mtama kwako uwele
Wataka taji kuvisha, kalamu zako za kale
Kubishana kumekwisha, wala sipige kelele
-
Suala hapa sindano, ukubwa wake mdogo
Umejifanya mbano, madhumuni ni mtego
Meno yako sio chano, wala kipande cha gogo
Napenda wako mfano, kunitekenya kwa zogo.
-
Hayo yako ni kuwa, husaki kwenye vichaka
Wasasi wote wauwa, hilo kwako sioshaka?
Sifa yako watunguwa, kumkosa ni mashaka
Yako yanokusumbuwa, sababu wajianika..
-
Umeanza kutapika, usasi wako ukoje?
Si ndege wala si nyoka, yoyote yule naaje
Kiumbe akiibuka, yawa mafusho mvuje?
Muhimu kwako kafika, huulizi kama muje
-
Wababaisha umati, silaya yako iwache
Papohapo ni machati, kwanini huanzi cheche ?
Muingie kati kati, manunguniko yawache
Sifa yake huipati, milele atabakia ni Che.
Hashil Seif
NTAMPIGA KWA MBALI!
Date: 07 April, 2006
- Usasini ni kunyata, wa huko miguu chini
Chini utawaokota, hadhari uwe makini
Makini wakutafuta, rangi ya macho kichwani
Kichwani ukipapata, nyama imo mikononi
- Pori lina ushujaa, kuwinda ni kuvizia
Kuvizia bila taa, ukitega wakilia
Wakilia huzubaa, ndipo ukauwachia
Ukauwachia chaa, mkuki ukamwingia
- Usingoje akufiye, uwache ukiwa ndani
Ndani utowe aliye, umbane mikononi
Mikononi mzuwiye, utowe kisu alani
Alani hadi shingoye, umchinje kiwa chini
Maher ( Unique )
NTAMPIGA KWA MBALI!
Date: 07 April, 2006
- Neno usasi kuua, kisu bunduki mkuki
Msasi anachagua, kama meno msuwaki
Kitandawili tegua, au nyanyo Mzandaki?
Nimechoka kupumua, mbele naona hilaki.
- Ushujaa sio pori, yule anaechagua
Sijui kama ngangari, au ngoma ya kilua
Hii ni defu safari, ukutanayo yaua
Hata uwe mwari, kipimo chanisumbua !
- Yamwisho kwako mauti, mikononi akufia
Viko vifo vya njukuti, vyengine moto fifia
Kitakiwacho si suti, nakudengua kofia
Hata uwe huna shati, jumba kuu kuingia.
Hashil Seif
|
