SIULUMBI MULUMBAO!

Date:  09 January, 2008

1. Ndimi mgeni wa Numbi, mwenyeji kale ‘nokuwa
   Nijili kwenu waambi, kuzinga la kuambiwa
   Bali hakuta ulumbi, nami ukanishituwa
   Na nilipouchunguwa, haona ni wa vitimbi.


2. Ging’ingi ya Waging’ingi, si ya miye mtolewa
   Nami nacha nena mengi, bawabu akanitowa
   Lakini hayanitwangi, maneno yanotumiwa
   Kulumbana kwa vifuwa, si ulumbi wa Ging’ingi.


3. Waging’ingi kwa ulumbi, ni kazi yenu najuwa
   Bali sio ujigambi, wa wengine kuumbuwa
   Kwamba mtamba hatambi, asikucha kutambiwa
   Mbona nyie mwacheuwa, au mushashiba tumbi?


4. Nasi tuli Waging’ingi, wa kutolewa vikowa
   Tukalumbana kwa mingi, bali lugha twechaguwa
   Mbona nyie hamutungi, mwaumba mukiumbuwa?
   Kwa hivi munabomowa, ndugu zangu hamujengi.


5. Lau kweli mu walumbi, lumbanani kwa satuwa
   Musilumbane kwa kambi, na pande pande mukawa
   Agambapo mjigambi, ujuwe hajajijuwa
   Kwamba lau ajijuwa, mwenye gambo hajigambi.


6. La urongo silirongi, madharaye nayajuwa
   Nawe ola Mging’ingi, ‘singoje ukalolewa
   Kwamba zipo siku nyingi, zako weye hapa kuwa
   Vipi ulomshushuwa, akaja kuwa ni mwingi?


7. Ulumbi wa ujigambi, na kujipiga kifuwa
   Mlangoni pa Ging’ingi, si jambo la kusifiwa
   Uonwe kuwa ni dhambi, na kharamu yenye dowa
   Nami ninawazinduwa, mukome huu ulumbi!

Mohammed Ghassani

SIULUMBI MULUMBAO!

Date:  10 January, 2008

1. Al Akhi mshairi , baswiri muona mambo
   Katu si yangu dhamiri , kukupiga kwa vikumbo
   Uliyonena hariri , tuyatakayo kitambo
   Wagange watagangika , Gin'gingi nawe ni mwako


2. Nduguyo akinaswa , kwa fitina kuwa chambo
   Huraiwa na kuaswa , asizidi kwenda kombo
   Kuongozwa si kukoswa , nasaha ni chema chombo
   Wagange watagangika , Gin'gingi nawe ni mwako


3. Walumbao yasolumbwa , watuumiza matumbo
   Awali ndivyo kuombwa , kutaradhiwa kwa nyimbo
   Mwishowe sawa kugombwa , washikiwe hata fimbo
   Wagange watagangika , Gin'gingi nawe ni mwako

Saleh M. Barkey