Akanidanganya

Date:  July 1 - 2004

1. Akanidanganya, akanambia takuja, hafikwa n'tabu, na mashaka na mauja
   Kaniparaganya, nami meishiwa hoja, yaliyonisibu, meona bora kuyaroja
   Nataka waonya, haya yangu si kioja, na wewe sahibu, upime na kuyachuja
   Yaliyompata Mtoja, yemfika na ..... mmoja. (Kassim Ali)
2. Akanighilibu, kumbe yeye ni laghai, na hana ahadi, ni vyema kumuepuka
   Mtu wa ajabu, mbaya, tena hafai, na pia fisadi, ni mbovu zake hulka
   Aweza jaribu, kuja kukurai rai, akipiga hodi, kwako mlango shindika
   Yaliyompata Mtoja, yemfika na ..... mmoja. (Kassim Ali)
3. Amenifisidi, nyingi sana zangu mali, sio mtu mwema, tapeli, mdanganyifu
   Aliniahidi, kwa hila za kifedhuli, kumbe anichuma, jangili mla nyamafu
   Nalizikaidi, nasaha zake ahali, mauja me'kwama, jahili la takilifu
   Yalompata Mtoja,yamemfika na? mmoja. (Ahmed Rashid)
4. Akanipumbaza, kwa tabasamu na cheko, tegoni hangia, nduyenu hapumbazika
   Sasa kajibanza, vimondo tele mbeleko, mwenzenu nalia, mashaka yamenifika
   Mepondwa cha pweza, mejaa masikitiko, mwenza angalia, usije kuhadaika
   Yalompata Mtoja, yamemfika na? mmoja. (Ahmed Rashid)
5. Ya nini mayowe, kuteleza ni kusoma, kakushinda tonge, mshinde kwa matoezi
   Hila zitambuwe, usibaki kulalama, usiwe mnyonge, inuka wacha ajizi
   Yawahi mwenyewe, sipembejee huruma, hata awe nge, nguruma aone kazi
   Yaliyompata Mtoja, yemfika na ......mmoja (Saleh Barkey)
6. Yataka vilinge, hila na ujanja mwingi, ndio umshinde, ukipate utakacho
   Kaweka mazonge, na vingi sana vigingi, wengi maafande, mezagaa kama kocho
   Mefanya vigenge, kampeni na mitingi, ni nini nitende, nimzibe yake macho?
   Yaliyompata Mtoja, yemfika na ......mmoja (Kassim Ali)
7. Ngoma ivumayo, mwishowe ni kupasuka, miko ni imani, na mipango kuisuka
   Kama huna moyo, lijalo wababaika, atakubaini, akuzidishe mashaka
   Ni mengi yajayo, sikuye nae tafika, uwe furahani, kiteweji kimteka
   Yaliyompata Mtoja, yemfika na ........mmoja (Saleh Barkey)