ASO CHAKE!

Date: 18 May, 2006

1. Aso chake hana lake , wala hatambulikani
   Na hata kwa walo wake , yeye hawi na thamani
   Neno ni la mwenye chake , aso chake hunenani?


2. Aso chake ni muinga , angawa mno mwerevu
   Angawa fundi kupanga , hambiwa ni mpumbavu
   Kwenye mambo humtenga , angaliya nazi mbovu


3. Aso chake si mzuri , angawaa kama mwezi
   Aso chake si hodari , angawa mno muyuzi
   Aso chake ni jauri , angawa ni mtukuzi


4. Aso chake ni fidhuli , na sawa yake ni jongo
   Anganena yalo kweli , huwambiwa ni mrongo
   Angawa huona mbali , huonekana ni tongo
5. Aso chake ni mchafu , naangawa maridadi
   Na aso chake ni dufu , angawa shekhe Biladi
   Hapati umaarufu , angawa mwenyeji jadi


6. Aso chake rai hana , angawa ni SAQARATI
   Aso chake akinena , wa kusikiza hapati
   Walo wake humkana , hata muda wa mauti


7. Mwenye chake ndie bwana , mwerevu mwenye busara
   Angawa hana maana , hupewa yeye bendera
   Husoza nasi huwona , hini ni kuu hasara


8. Na hini ndiyo sababu , ya mambo kuharibika
   Zimetuzidi taabu , na kwetu kumefujika
   Na tamaa ya karibu , hapana kutengezeka


9. Ni sharuti tubadili , na fikira tugeuze
   Wakisimama wawili , mwenye chake sishunduze
   Tumpe mwenye akili , ili chombo achoweze

Limetunga na Ustadh Mahmoud Ahmed Abdul Kadir (MAU) kutoka Lamu - Kenya.

Limeletwa na Sheikh Saleh Barkey