KUUKOMBOA WA'TANI
(Kutoka Katika FZV)

Date:  25 February, 2005

Utenzi huu ulitolewa katika gazeti la Umoja wa Wazanzibari (Free Zanzibar Voice) mnamo 1968 linaonesha hisia za Mzanzibari mwenzetu akitunadia katika ukombozi wa Wattani wetu, juu ya fahamu yake kuwa Wattani ndio mama yetu. Ni miaka thalathini na saba, yaani tangu 1968; lakini yaliosemwa ni madhubuti na ni kama yamesemwa jana au leo. Hapana shaka Wazanzibari ni wenye uwezo wa kuirejesha Dola yao Huru ya Zanzibar kama ilivyokuwa kabla ya mavamizi ya 1964. Penye nia pana njia.

1. Wat'ani watoja damu, 'tabibu twapiga hodi
   Hima hima muadhamu, Sinene nenda urudi
   Kukawia ni haramu , na kutoa huna budi
   Kwani hii ni Jihadi, kuugomboa Wat'ani
2. Mwanao ayayatika, mama muwahi waladi
   Mwanao atakutoka, usipofanya juhudi
   Kilio chake pulika , kinapasua fuadi
   Isaidie Jihadi , ya kugomboa Wat'ani
3. Mamiyo alokuzaa , ni mpweke na wahedi
   Kakuzaa kwa fazaa , na dhiki mno shadidi
   Zengea yake ridhaa , ipate ya Wadudi
   Kwani hiyo ni Jihadi , ya kugomboa Wat'ani
4. Na baba yako mwanangu, na pia na wako jadi
   Usiwatie matungu , hata ukapita hadi
   Kumbuka zama za tangu , uwache yako inadi
   Wajibu wako Jihadi , kuugomboa Wat'ani
5. Mama watoto nyumbani , alozaa auladi
   Mkapishana yamini , kukidhi wenu muradi
   Wote hao ni Wat'ani , na hao ndio biladi
   Unga mkono Jihadi , tuugomboe Wat'ani
6. Na nchi yetu tukufu , si maiti ni shahidi
   Kwani shahidi si mfu , kila siku ni jadidi
   Umma hai mashe khofu, walo mbali watarudi
   Wataingia Jihadi , kuugomboa Wa'tani

Mzanzibari
1968

Umeletwa na Farouk Amour