Mja!

1. Mja hutashiba kula, Waona ladha daima
   Mja wakonga na ila, Hujui bora khatima
   Mja hiyo ni ghafala, Na kukutaza si vyema
   Ulipofika simama, Urudi kwa Mola wako
2. Urudi kwa Mola wako, Ghafuru ndio Rahima
   Dhiki na taabu yako, La'ala ndio salama
   Nuwiya kwa dhati yako, Toba isiyo na dhima
   Ulipofika simama, Urudi kwa Mola wako
3. Mja usihadaike, Sikiya yangu kalima
   Bilisi asikushike, Ukasahau Kiyama
   Fahamu safawa yake, Siku hiyo ni hasama
   Ulipofika simama, Urudi kwa Mola wako
4. Mja fikiri mauti, Sikuhadae uzima
   KYAM waliofaiti, Mashujaa hapo zama
   Wasikiya huwakuti, Na hio ndio salama
   Ulipofika simama, Urudi kwa Mola wako
5. Mja khofu siku hiyo, 'L-hashiri wannadama
   Ni siku ya makamiyo, Kufufuliwa 'aama
   Ni wewe na amaliyo, Hiyo siku ya zahama
   Ulipofika simama, Urudi kwa Mola wako
6. Mja ladha ya duniya, Haitakwisha daima
   Mja ufikiri njiya, Sirata 'l-mustaqima
   Njiya inayo baliya, Ndani yake jahannama
   Ulipofika simama, Urudi kwa Mola wako
7. Ewe mja tafakari, Inuka ukiinama
   Wenda ndani ya kaburi, Hapana baba na mama
   Mja khofu munkari, Na fimbo zake za chuma
   Ulipofika simama, Urudi kwa Mola wako
8. Mja mkhofu Jalali, Kwa siku ya mahakama
   Siku ya Rabi kujali, Wa yuhyi 'l-idhama
   Siku hiyo ya kitali, Rabi asiyo huruma
   Ulipofika simama, Urudi kwa Mola wako
9. Mja natia tamati, Yangu nasaha nakoma
   Mja duniya sukuti, Quruani kunasoma
   Haihati haihati, Mauti kwako lazima
   Ulipofika simama, Urudi kwa Mola wako

 

Khamis Nassor Al-Nabhany