MUHOGO

Date: 10 October, 2001

1. Katika chakula tiba - Hapana kama muhogo
   Ya kwanza una haiba - Ukiwa wa mkorogo
   Uwe mwingi wa kushiba - Usiupike kidogo
   Uufaidi muhogo - Pakiwa na utowezi
2. Pakiwa na utowezi - Amma huwa kivurugo
   Ukiupatiya ndizi - Ukate wa mchachago
   Ulainike na nazi - Mafuta yafanye sago
   Uufaidi muhogo - Pakiwa na utowezi
3. Muhogo hauwi mwema - Kwa makambare na ngogo
   Shati upatiye nyama - Japo ngozi ya kichogo
   Au likiwa vumbama - Liwe nene kama gogo
   Uufaidi muhogo - Pakiwa na utowezi
4. Mshelisheli mweusi - Na mbega una titigo
   Ukiupatiya tasi - Ukiula pana zogo
   Na chumvi iwe kiasi - Isije tiwa kwa wigo
   Uufaidi muhogo - Pakiwa na utowezi
5. Kolekole kwa yakini - Ni mtamu kwa muhogo
   Uutiye sahanini - Wala pasiwe na zogo
   Tena upate laini - Usiwe na kiparago
   Uufaidi muhogo - Pakiwa na utowezi
6. Muhogo minal-ali - Usiokua mchego
   Utie tuwi kalili - Si jingi la mkobogo
   Na samaki afadhali - Asiwe wa mchunjugo
   Uufaidi muhogo - Pakiwa na utowezi
7. Kadi tama sitazisha - Zote sifa za muhogo
   Beti saba zinatosha - Kutiya watu mchego
   Jama kulima yapasha - Tuiwacheni mikogo
   Uufaidi muhogo - Pakiwa na utowezi

Maana ya maneno alivyokusudiya mtungaji.

Beti 2   kivurugo = furaha
              mchachago = mdogomdogo
              sago =  kuganda (mfano mchuzi wa mafuta unapopowa)

Beti 3   vumbama = aina ya samaki
beti 4   mbega = aina ya muhogo
             kwa wigo = kwa wingi

Beti 5   kiparago = mgumu (kiparago ni kitu kigumu)

Beti 6    minal-ali = mzuri
              mchego = ambao hauivi
              la mkoboko = la inda
              mchunjugo = mbaya ; mwenye miba; ovyo ovyo
Beti 7    mchego = hamu = raghba
              mikogo = pozi

Limeletwa na Saleh Barkey

Alipewa na Sheikh Khamis Bin Nassor Al-Nabhany