Naliya!

1. L-akhi nakuja kwako, Kukupa niliyo nayo
   Ni mbali nitokeyako, Nakuja kwa haja hiyo
   Nakuja kwa sikitiko, Na tena nna kiliyo
   Naliya ndani ya moyo, Kwa kuninyima harusi
2. Naliya nasikitika, Kuninyima harusiyo
   Naliya nahuzunika, Sijuwi niyasemayo
   Naliya nikikumbuka, Kunikhasimu kakeyo
   Naliya ndani ya moyo, Kwa kuninyima harusi
3. Naililiya suhuba, Nzuri tuliyonayo
   Naliya hipiga toba, Hiyakumbuka mamboyo
   Naliya hii dharuba, Ni kubwa unipigayo
   Naliya ndani ya moyo, Kwa kuninyima harusi
4. Naliya sikukudhani, Waweza kufanya hayo
   Naliya nimebaini, Kuwa ndiyo tabiayo
   Naliya nna huzuni, Nawe fanya upendayo
   Naliya ndani ya moyo, Kwa kuninyima harusi
5. Naliya nikifikiri, Ni mengi niyawazayo
   Naliya sina nadhari, Kwa hayo nikumbukayo
   Naliya nikisubiri, Nayangojeya yajayo
   Naliya ndani ya moyo, Kwa kuninyima harusi
6. Naliya hiomboleza, Katu furaha sinayo
   Naliya sitanyamaza, Roho yangu yenda mbiyo
   Naliya chaniumiza, Kidonda cha dundumiyo
   Naliya ndani ya moyo, Kwa kuninyima harusi
7. Naliya natiya tama, Shairi niitungayo
   Naliya siwezi sema, Nnafikiya upeyo
   Naliya yananikwama, Mabaya unifanyayo
   Naliya ndani ya moyo, Kwa kuninyima harusi

 

(Kidonda cha dundumiyo = Kidonda cha kooni)

DUNDUMIYO = koo = koromeo

 

 

Khamis Nassor Al-Nabhany