|
|
Tahadhari Na Ukimwi!
Date: 17 June, 2006
- Nataka towa nasaha
Ya dhati si ya mzaha
Kuhusu kuu jaraha
Dunia liloingiya
- Jaraha ni la ukimwi
Janga lake halikomi
Limekuwa kama zimwi
Hula mmoya mmoya
- Ukimwi dawa hauna
Tena ni khatari sana
Kwa wazee na zijana
Wake na waume piya
- Ukimwi ukikushika
Yuwa zako zimefika
Ni mno utateseka
Wewe na wangine piya
- Ukimwi hukukondesha
Damu ukakukausha
Sura zikawa hutisha
Jamaa wakukimbiya
- Basi ndugu jihadhari
Ukimwi una khatari
Kuu mno lake shari
Ni nyingi zake balaya
- Jitunge kila wakati
Epuka uhasharati
Sifanye hata katiti
Mtegoni utangiya
- Hiyo ndiyo yake kinga
aha zote kuzifunga
Kubali kuwa mjinga
Salama kuipatiya
- Uzinifu si werevu
Bali ni maangamivu
Na mangineyo maovu
Ni chambo hukuvutiya
- Muangaliye samaki
Kinena chambo sitaki
Asilani humshiki
Salama atasaliya
- Na wewe mwana Adamu
Mungu mekupa fahamu
Huwaje ukanywa sumu
Na hali waangaliya
- Fikiri yako maisha
Kwa nini wayafupisha
Wanao kuwabakisha
Yatima bila hatiya
- Wewe kwa kutaka raha
Wengi wawapa karaha
Haya mambo si mzaha
Yataka kufikiriya
- Wenda kujitumbukiza
Kwenye janga lenye giza
Wenzio kuangamiza
Kwa rahaya mara moya
- Wajitiya mayutoni
Wewe mwenyewe mwendani
Huu ni ujinga gani
Kifo kujitafutiya
- KIfo si chako wepweke
Utamuuwa na mke
Watoto waungulike
Lipi walilokoseya
- Tuate uhasharati
Na kwa hishima tuketi
Ukimwi hautupati
Illa tukiuzengeya
- Na zaidi wasichana
Kadhalika wavulana
Hawa ndiwo wengi sana
Kwa ukimwi kupoteya
- Wasichana barobaro
Jiziwiyeni mparo
Hapo utakwenda ziro
Ukimwi kutosaliya
- Jiepusheni kabisa
Na za upuzi anasa
Hizo ndizo huwatosa
Mtegoni mukangiya
- Ukishapija mtindi
Lolote halikushindi
Hata koo kwenye landi
Mwenyewe utaitiya
- Wewe ndiye muamuzi
Na wangine hawawezi
Ukiamua upuzi
Mwenyewe utaumiya
- Nasaha naikariri
Tahadhari tahadhari
Ukimwi kuu khatari
Inatishia duniya
- Kauli yetu tammati
Ni nasaha kwa umati
Hayana dawa mauti
Ukimwi ni moya ndiya
Mahmoud A. Abdulkadir (MAU) - Lamu, Kenya
|
